4 أشهر مرّت على حادثة المرفأ… خطيب المسعفة سحر فارس …120 يوم صرلي ما شفتك كأنن ٤ سنين.. العيد هالسنة غير!!

كتب خطيب الشهيدة سحر فارس، جيلبير قرعان، في حسابه الخاص عبر موقع انستغرام في ذكرى مرور 4 أشهر على انفجار المرفأ: “اسمر اللون وعيونو السود

يا عروستي البطلة الحلوة اليوم بيصير الك ٤ شهور غايبي عنّي ، ١٢٠ يوم صرلي ما شفتك ولا سمعت صوتك ولا حسيت بحنيّتك ، ٤ شهور كأنن ٤ سنين يا روح قلبي انت ، لا عقلي قادر يصدّق انك فليّتي ولا قلبي عم يستوعب غيابك ، انت معي بكل ثانية و بكل خطوة ، انت بقلبي و بعقلي كل تكّة ، عم بحكيكي كل ثانية لانك معي بعدك الفرق بس مش عم تردّي عليي ، بس انت بطلة والابطال ما بتموت ، انت ما كان بدك تموتي ، انت كان بدك نعيش سوا ، نفرح سوا ، نعمّر بيتنا سوا ، نكبر سوا ، نتزوج و نبني عيلة سوا ، نختيّر سوا انت رحتي و المجرمين ضلّو ، كوني معي واعطيني القوة حتى المجرمين يلي عملوا فينا هيك ياخدو حسابن عالارض قبل حسابن بالسما.

كل ما قرّب العيد عم اتخزّق من جوّا اكتر يا سوسو ، وين يلي كنت من اول الشهر بلش دورّلو شو بدي جبلو هدايا ، وين يلي كنا ننطر نشوف شجرة الميلاد والمغارة ، وين يلي بدي قلّو بدنا نعيّد مع اهلك وانت تقوليلي لا مع اهلك انت

العيد هالسنة غير ، الو طعمة غير ، بدنا نستقبل يسوع بغصة و حزن لانك غايبي بالجسد بس عيدك بالسما اجمل بكتير و حنصلّي نحنا و ياكي بليلة العيد و نستقبل يسوع

عيوني اشتاقو يلمحوكي لمحة يا سحر
دينيّي مشتاقين يسمعوا اسمي بصوتك الحلو
اشتقتلك كتير … كتير يا عمري