بالصور | الطفلة ‘آية’ المصابة بالسرطان تكتب… ‘من سنتين وانا بالحجر الصحي.. الضهرة الوحيدة هي عالمستشفى لاخذ العلاج… بليز خليكن بالبيت بوقت كورونا’!!

“نشر مركز سرطان الاطفال في لبنان قصة الطفلة “اية” المصابة بالسرطان والتي كتبت:

رحلتي بالحجر الصحي؟
“كانوا هالسنتينن صعبين كتير على الكل، وخاصة بالنسبة الي. من سنتين تم تشخيص إصابتي باللوكيميا (سرطان الدم). وانا بالبيت او بالمستشفى من هيداك الوقت. ما كان فيي روح على الأماكن العامة لأنو عم باخذ العلاج الكيميائي والمناعة عندي كانت كتير ضعيفة، وممكن انصاب بعدوى من اي شي. يعني من قبل ما يبلش الكورونا وانا معزولة.

بتفكورا انو زهقت؟ ابدا!
القعدة بالبيت أو المستشفى ما بتعني أنو ما كنت عم بستمتع بوقتي! كلنا لازم نتحمل شوي حتى تمر هالفترة الصعبة. هيدا درس تعلمته.
بهالأيام الصعبة بستمتع بكل دقيقة من الحجر وبستفيد منها. بس حس اني منيحة، بحضر دروسي اونلاين وبعمل فروضي. وكمان بساعد أمي وبعلمها كيف تستعمل الكومبيوتر. امي معلمة ولازم تعلّم اونلاين كمان. اكتشفت موهبتي بالرسم. وبلشت ارسم الماندالا واحضر فيديو بدروس عن الرسم ليصير عندي خبرة. وكمان بغنّي وبسمع أغاني وخاصة لجوزيف عطية.

مثل كل البنات، بلبس تياب حلوة وباخد صور. وبصور بسيناتي وبقضّي وقت مع العيلة وبلعب ورق وبحضر TV و Netflix وكل يوم بحكي مع خيي بالفيديو وبحب أطبخ مع أمي.

الضهرة الوحيدة هي كل يوم جمعة بس روح على مركز سرطان الأطفال بلبنان لآخذ علاجي.
أخيرًا، بحب قول للكل انو يستفيدوا من كل لحظة من الحجر وما يفقدوا الأمل أبدًا. الجاي أفضل من المضى. بليز خليكن بالبيت. ببعتلكن كل حبي “.

https://www.facebook.com/CCCLebanon/posts/3769040109817743