هذا ما قاله المنسي … بطل من معركة البرث يروي تفاصيل اللحظات الأخيرة مع الشهداء

اغتالت إيدي الغدر والخسة عدد من جنود مصر البواسل في معركة كمين البرث بسيناء وراح في حمى مصر عدد من البواسل والأبطال وأبرزهم الشهيد البطل أحمد منسي والذيتناوب قصته مسلسل الاختيار في رمضان 2020.

ورى إحدى أبطال المعركة مقاتل فدائي صاعقة أحمد عزت عبر حسابه الرسمي على Facebook تفاصيل اللحظات الأخيرة مع الشهداء ةمال قاله له الشهيد البطل أحمد منسي.

وكتب عزت:

اللهم ارحم شهدائنا الابرار

مش هنسي كلام قائدي الشهيد عقيد ا.ح بطل/ احمد منسي لما طلبت انضم لقوه المداهمات وقالي ” طالما في قلبك خير لله ولبلدك متقلقش هتداهم حتي لو في اخر يوم فجيشك بس اضحك وفكها وكل رغيف الجبنه ده”

مش ناسي كلام قائدي شهيد نقيب بطل / الشبراوي قبل الحصل بيومين “خلاص يا عم احمد ولاتزعل نفسك هحطك مكان النص بوصه بس لما نرجع من الاجازه”

الشهيد الظابط ملازم اول بطل \ خالد المغربي انت محترم ويجي منك يا عسكري بس بعد المدح ده تصورني فالاجازه هاه

الضابط ملازم اول بطل \ احمد فهيم “ انت ليك مهمه ومتخافش هيجي يوم وتداهم “

زميلي الشهيد عريف بطل \ فراج لو مسكت الجهاز ده عينك في وسط راسك واصحي عشان دول بيغفلو وبيضربو من الضهر

مش ناسي ابتسامه الشهيد عريف بطل هرم واحنا في اخر طبق فول كلناه قبل استشهاده ب ساعتين وكلامه عن اخوه الصغير وعزومته ليا علي فرح لما عرف اني عمري ما روحت افراح فيها ضرب نار فالدلتا

الشهيد رقيب بطل \محمد اسماعيل الساعه ٢ص بيهزر وقاليعزت امشي تكتيكي وهاتلنا ازازه ميا عشان شكلها في شبوره

فاكر كل واحد من زمايلي

الشوفته في ال ٣ ساعات بالتمركز مش مجرد ضباط وعساكر وشويه دواعش تكفيرين جبناء حاصرونا ووجهو صواريخ وعربات مفخخه ودانات هاون لا انا شوفت ناس خايفه علي بلدها وزمايلها

كنا بنطلع من تحت انقاض البيت متصابين ونضرب بالسلاح

بنشيل زمايلنا المتصابين من اثر الصاروخ الاولاني واحنا متصابين ال بطلق فيده والي فكتفه وال فرجله

سندت الضابط البطل “السباعي” وسندني النقيب البطل الشهيد “شبراوي”

شوفت البطل “ علي علي” الضرب اخر طلقه معاه وجري ٣ كلاب معاهم سلاح داخلين علينا واستشهد بكل بطوله وزعقلي “ارجع ارقد ”

حكاية الأسطورة أحمد المنسي

مقدم من: الاختيار

محدش من الصاعقه بيهرب او بيخاف ثباتنا ده واجبنا لله ولوطنا وارضنا

الساعه ٦ ص سامعنا صوت قائدنا البطل الشهيد “المنسي” فوق السطح “ اثبتوا يا ابطال” الجمله دي خلتني هحارب حتي لو اشتباك من غير سلاحي، اه كنت مصاب في ايدي وبنزف وطلق فرجلي وخدي بس وقفت علي رجلي وشلت السلاح وامنت زمايلي وزمايلي حمو ضهري وثبتنا كلنا

ومكنتش مصدق انه استشهد لحد ما طلعت فوق ولقيته استشهد وسلاحه في ايده وبيضرب منه طلق عشوائي في انفاسه الاخيره

من اجمالي ٦٠ بطل متبقاش غير الظابط “احمد السباعي” مصاب ودفعتي مؤمن وزميلي خالد السفاح مصاب وانا مصاب

بلوم نفسي اني نفذت الاوامر وتمركزت فالدور التاني ومتطلعتش اامن ضهره او حتي منزلتش علي الاقل كنت صفيت اكتر من الكلب الطلع لينا والكلب الصبته وهرب

انا كل حاجه حصلت فاكرها بالثانيه ولما نزلت اجازه اسكندريه ركبت مع شاب سواق اوبر قالي الف سلامه ده حادثه في الجيش ولا بره

قولتله انت مسمعتش عن الحصل وقالب البلد

قالي ااااه المرجيحه مريحه وحوار غاده عبد الرازق الناس دي حسبي الله فيهم بوظو البلد يا باشا

قولتوا اه والله عندك حق دي حادثه موتوسيكل متشغلش بالك

فمش بقول الكلام ده عشان عايز حد يقولي بطل لاني مش بطل انا كنت بأدي واجبي تجاه لله ووطني وارضي وزمايلي واي حد مكاننا كان هيعمل كده ومحدش فينا كان مستني شكر ولا اغنيه للشهداء

لان القوات الخاصه علمتنا عقيده النصر او الشهاده

مقاتل فدائي صاعقة \ احمد عزت، الكتيبه 103 صاعقه، التضحيه الفداء المجد

الاختيار بطولة أمير كرارة وأحمد العوضى ودينا فؤاد وسارة عادل وضياء عبد الخالق وعدد كبير من ضيوف الشرف، تأليف باهر ‏دويدار وإخراج بيتر ميمي وإنتاج شركة سينرجي‎.‎

يتناول المسلسل حياة أحمد صابر المنسي – قائد الكتيبة ‏‏103 صاعقة – الذي استشهد فى كمين مربع البرث، بمدينة رفح ‏المصرية ‏عام 2017، أثناء التصدي لهجوم إرهابي في سيناء، ‏على أن يُظهر العمل العديد من الجوانب الاجتماعية والإنسانية ‏في حياة البطل ‏الراحل‎.‎