بالصورة | الأم ‘فاطمة’ تنعي طفلتها الرضيعة ‘رشا’… شهور من السعادة بولادتها انتهت !!!

“نشرت صفحة مكتب المنية للاعلام:

إنا لله وإنا إليه راجعون .

الأم فاطمة نصر الدين تنعي إبنتها على الفيسبوك قائلةً :

#حسبي_الله_ونعم_الوكيل_بمن_كان_السبب_بموت_طفلتي ، بهذه الآية الكريمة أبدأ رواية قصتي مع

مستشفيات البقاع .

بنتي رشا عمرا سبع شهور خلقت ما بتعاني من أي مرض وعالأربع أشهر صارت أدبدب ومن شهر صارت تقول

بابا وماما ومين ما يشوف رشا يحبها ع هضامتها وجمالها وضحكتها ف رضعت بنتي الساعة ٦ صباحاً ودشيتا

وقامت تلعب بهالبيت ، والساعة ١٢ ظهراً نامت والساعة ٢ إلا عشرة بستفقدا بلاقيها نايمي ومرتاحة قلت حرام

نايمي مبسوطة ما بدي إزعجها ف الساعة ٢ بطلع عليها ومتل كأنها ميتي حملتا وركضت فيها ع مستشفى

البتول بلاقي الدكتور عماد مخ بيعطيها للبنت أوكسيجين حتى صار عندا التنفس مية بالمية والأوكسجين مية

وبقول لي بنتك متشردقة بالحليب بقلن ما صار هالشي ، بقلولي لا هيدا الصاير وبنتك بدا عناية وبيترك بنتي

وبفل وعناية بالهرمل ما في المهم من الساعة ٢ ظهراً للساعة ٧ مساءً ونحن نبوّس أيادي حتى بس يلاقولي

سرير لبنتي العم تموت بالمستشفى آخر شي من بعد تدخل حزب الله قدروا يحجزولي سرير بالعناية

بمستشفى أمل الجامعي جبنا الإسعاف حتى تنقل بنتي بقلولي ما مننقلا إذا ما راح معها دكتور أو ممرض ة ف

ولا دكتور ولا ممرضة قبلوا يرافقوا بنتي بالإسعاف أخر شي في ممرض بالمستشفى إسمو حسين علوه

بيشلح المريول وبقول بالحرف الواحد خرا عالوظايف أنا رايح مع هالطفلة المهم منوصل عالمستشفى بشوفا

الدكتور بقلي من بعد شو جايبتها متأخرين عليها كتير بلشولا بالصدمات الكهربائية ساعتين ثلاثة بالمستشفى

كلها محاولات فاشلة وإذ بقلي الدكتور تبقالنا سلامتك كان لازم تكون بنتك بالعناية من أربع ساعات رجعت

ومعي جثة بنتي اللي كانت عم تلعب وتركض الصبح قولولي شو بدي أعمل مين المسؤول عن موتها ؟ هل

ماتت بنتي بخطأ طبي ؟ أو بتقصير مني أو تقصير من الطاقم الطبي ما عم بعرف كيف صار هيك وما عم بقدر

إتخايل البيت من دونها موّتولي بنتي قدام عيوني وبقلولي ماتت بالحليب وبنتي مطعميتا من الساعة ٦ الصبح

أنا كل البطلبوا من وزير الصحة والجهات الأمنية التحقيق بقضية بنتي والسبب خمس ساعات ونحن ندخّل

عالمستشفيات حتى بس نقدر نحجزلا سرير بمستشفى ولولا الواسطة ما فاتت وهيدا التأخير كان السبب

الرئيسي بموت بنتي .

الله يرحمك يا بنتي إنتِ طلعتي لعند رب أرحم منهم خبريه يا رشا عن العملوه فيكِ هو الوحيد اللي بياخدلك

حقك يا ماما .

رحمها الله وغفر لها وألهم أهلها ومحبيها الصبر والسلوان